حدوتة

يمكن تكون حدوتة

و يمكن تكون كانت عاوزة تكون حدوتة و معرفتشس

"كان مرة في... "

أو .. "كان مرة مفيش .. "

كان مرة.. و مش مهم

المهم

ان ابطال الحكاية

كانوا متقسمين

نصهم مصدق انه جوه الحكاية

و نصهم بيتفرج من بعيد

و يشوف

ان "كان كل المرات... مفيش"

غيروها

ف بقت كل الحواديت تبتدي كده

"هيكون مرة في... "

و جربوا

واحد قال: "هيكون مرة في خطوة مش مكسورة، و عارفة الطريق اللي لابس سحابة و مخبي الأسفلت عشان ميجرحش الحلم اللي بيجري زي طفل راجع م المدرسة بسرعة عشان يلحق الكارتون"

وواحد قال: "هيكون مرة في .. مسافة مش حقيقية.. و اللقا مش كداب"

وواحد قال: "هيكون الصوت.. مش صدى"

بس الغريب

ان كلهم بعد ما خلصوا الـ "هيكون مرة في... "

اكتشفوا ان هما مش موجودين.. و انهم عايشين ف اللي هيكون ف الحكاية اللي لسة مألفينها

و ان كل اللي هنا.. صدى/ انعكاسات/ فراغ!

ضحكوا على نفسهم قوي

و فكروا يعكسوا الفكرة

و ان طالما هما مش موجودين و اللي "هيكون ف مرة" برده مش موجود/ و ان كلهم صدى

يبقى هما حقيقة بالنسبة لبعض.. و بالنسبة للمسافة/أو الخطوة المكسورة و الأسفلت

اللي بيتفرجوا عليهم من بعيد كانوا بيحسدوهم عشان مش قادرين يلمسوا اي حاجة/ بيتفرجوا و بس

و اللي لامسين كل حاجة/ بيحسدوا اللي بيتفرجوا عشان مش تايهين و شايفين كل حاجة واضحة من بعيد

الحكاية كانت هتخلص لو المؤلف نسي يشرب القهوة و نام

!