Thursday, May 2, 2013

سُكْر



ساعات لما بتعلق فكرة انك تكون مبسوط -وعيا أو لاوعيا- على حاجة انت متأكد انها مش هتكون موجودة، بيكون مجرد مبرر لانك تزعل من غير ما ضميرك يوجعك انك زعلان على ولا حاجة، وكأن الزعل إدمان، أو حشو فراغ زي كل حاجة تانية، ف كل الحالات كل اللي بنعمله هو مجرد تمرير للوقت أو تفادي للملل، أو عشان لما حد يسألك "بتعمل ايه" تلاقي إجابة.

الوصول لتالت يوم من غير نوم بيخللي كل حاجة أبسط، الضبابية اللي بتكون على الرؤية، والدوار ف الدماغ بيلغوا ملامح وتفاصيل كتير، مؤلمة أو مبهجة مش هتفرق، أشبه بحالة سُكر، لكن مش بيلغوا رغبة وقتية في الرسم، متعلقة على ان مفيش قماش أو ورق. ولا بيقللوا ألم عصبية المعدة والصداع.

غياب الرغبة ف أي حاجة بمجرد حضورها، مش لفكرة امتلاكها، لكن لانها كانت مبرر عابر لرغبة أكبر ف ممارسة الحزن، لكن سخف الفكرة بيبعدها، لمجرد صعوبة تمريرها على النفس أو مواجهة التفاصيل.